Мен, Нұрай Икина. 2007 жылдың 28 наурызында Қызылорда облысы, Арал ауданында дүниеге келгенмін. Балалық шағым туған өлкемнің теңіз иісі аңқыған, еңбекқор адамдарымен танылған Арал жерінде өтті. 11 жыл бойы №220 орта мектептің қабырғасында білім алып, мектеп өмірінің белсенді оқушысы болдым.
Қазіргі таңда, Алматы қаласындағы Халықаралық ақпараттық технологиялар университетінің журналистика факультетінде 2-курс студентімін.

Университет қабырғасында алған білімім мен тәжірибемнің арқасында сюжет түсіру мен репортаж жасаудың қыр-сырын меңгеріп келемін. Болашақта қоғамдағы өзекті мәселелерді көтеріп, тың тақырыптарды терең зерттей білетін, сөзі өтімді, ойы ұшқыр журналист атанғым келеді.

Журналистика – мен үшін жай мамандық емес, өмірлік бағыт. Себебі бұл сала маған адамдармен тіл табысуды, қоғамдағы оқиғаларға бейжай қарамауды және өз ойымды ашық жеткізуді үйретеді.

Алдағы мақсатым – өз мамандығымды терең меңгеріп, кәсіби журналист ретінде қалыптасу. Сонымен қатар шетел тілдерін меңгеріп, әлем елдерін аралап, түрлі мәдениеттермен танысып, ерекше тақырыптарда қызықты репортаждар дайындағым келеді.

Бос уақытымда кітап оқығанды, жаңа адамдармен танысып, заманауи медиа саласындағы жаңалықтарды зерттегенді ұнатамын. Мен үшін әр күн – жаңа мүмкіндік, әр қадам – үлкен арманға апарар жол.